Matthew 11

1Shi Yesu ɓo ku nya zo wa bara wu, ɓa kuka ɓalo azhi yakwo, ɓai zhin waʼazi n ɓa ɓei ku shiri zhin ɓa lo nyi.

Yesu Wa Mi Yohanna Gni

2Yohanna batisma zhin-yi, woi dna n kurkuku, wa wo aɓo wo-woi n Masihu zhin lo, wa tnu wa bara ɓa nya Yesu ɓo, 3Oho nu zhin eza n yi pmi, kwo yi ye tuwye na bye na?

4Yesu a gna ɓa, “Fye lo fye gna Yohanna aɓo awo-woyi n fye ku gye mi zhin: 5Awyebuayi ɓai gye wyeba, aza bmazhi ɓai zan-zan, akuturu ɓai gwo kagna, atnubua-gunayi ɓai wo ɓeda, azafi yi bwa wye-wyei, fye gna wo mi Nabari manayi ɓo, n Mi da na wyekwoyi aba nyi. 6Fye gna wo ge, ʼanabarka nu nazayi n ɓa ta zhin shaka ntu mi ɓo m.”

7– 8Shi ɓa ɓo kuka, Yesu wa ya ɓeda tu Yohanna tukwo. “Esa fye ɓo lo zhabui ntu ge fya gye Yohanna, fye ɓo gye ge aɓo gye wo wuna? Ngye agbegbe n ese ci n ɓai nyi? Kwo fye ɓo gye ge fye ɓa gye eza na jei kpe ngye ʼsu nugun na? 9Ko fye ɓo wyei tu n anabi Shekwoyi nya na? E, woi du anabi lo. 10Ntu ge Yohanna nu na ɓo da wo ɓo dna n Alkawali kwo-kwoyi ge, tnu-tnu yi n wo ɓa ɓe n ma bye, wa gna aza emi ɓeɓe ɓo, wa zhin zokwo aba.

11“Gaiciya, dna aza vinya na la ɓa luma, zaho to n buzagna yi ngye Yohanna m, du-du lonu, buzagna ɓi-ɓiyi n Shekwoyi ʼbe mi, kwo ɓei la du wo! 12Tunyi, esa nu Yohanna ɓo ya waʼazi zhin ɓedo n batisma yi har n sayi, aza mwa begye lo ɓai ɓe Shekwoyi ebe mi. 13Ntu ge Musa owa ɓedo anabi yi oɓa vinya ɓo na wyeyi shi nabye ntu Masihu ɓeɓe ɓo. Yohanna pmi wa ɓe. 14Ndei fye ye lo fya kpe ɓeye n mi da, wonu zhin Iliya, eza nu anabi ɓei gna wo ɓa ɓe (n Shekwoyi ebe ya sa.) 15Ngye fye na tnubua ɓowo nyai lo, fye wo n saiye.

16“ ‘Miɓa da ge na tu naɓe ye tukwa? Aza deye wu lo ngye aɓi fan awye ɓai yi aje ge anugundo ɓiyi, 17Ya fan awye ngye yi pa mula, ta da fye m, ya fan awye ngye yi biza, to fya zhin bugba zhi-zhiyi m.’ 18Ntu ge Yohanna to ɓei sin nuwan shu-shuwuyi eje m, saho to wa gyi nyagyi m, ama fya gna wo zhin nyazei nu. 19Emihin, Masihu, mi gyi mi sin, fya da gnunu-gnunu ge, mi zhin fwanada nu mwa, miyi zan na laifi nukwoi da yi. Ama efye aza cece, fye kpe shi fye kna fyehin a pita nfye tna gaiciya doho-dohoyi.”

Pmagna Ɓedo N Yi-yi-i

20Wa pmi wa ya aɓeda bugba wunya da, tu na zhi tukwo aba wo ɓeyi ku aɓo wo-woyi zhin, ama dudu lonu to ɓa ga Shekwoyi gaiciya m. 21“Aiya n fya ba Korazi, aiya njesun n Ɓaisaida aba, Ntu ge aɓo wo-woyi n mi ku zhin n fya ba nyi, aɓoi gna ɓa zhin ɓa lo nu n Taya ɓedo Saida yi ɓa ɓei ɓa ku ye abui sapa-sapa dna vinyikwo n tukwo gba yi.

22“Gaiciya, Taya n Saida yi ɓei gna fye bmiya zhi n wada wyi yi. 23Kafarnahum n kohin, n na koi latu nyi, kwo ɓei lo ʼna! Ntu ge aɓo awo-woyi n ma zhin n ha ba nyi ai ya gna a zhin ɓa n Sodom nu, kwo ye ɓei ye lo naiye.

24“Gaiciya Sodom ɓei la gna fye bmiya shi n wada wyi yi.”

25Yesu wa zhin aduwa ge, “O Dada, Dagayi, eshe nya n ʼkni yi, ma gode ngye shi ha so gaciya naza ba nɓa gye ɓahin tukwo ge aza ceceyi nu, ha wu ko naɓi nawyi aba. 26E, Dada kwa da ho nu ha zhin ko lo nu.

27“Emi Dada ku anya vinya fa fi n ma kun. Dada gmanyi wo nu kpe Nugun ye, Nugun ce wa kpe Dada fye ɓedo naza yi n Nugun wu ɓa Dada. 28Fye ɓe maba miɓa ga fye sun-sun, efye nu n fye naya shan-woi kpe. 29– 30Fye la ma kaya, ɓa wo lo fafa miɓa wu fye ge mi zhin eza hankali da nu n bugba sun-sun gye nya yi, efye wye-wyei ɓa bwa sun-sun. Ntu ge mi ta ga za akaya shan-wo yi m.”